性愛過敏 邊做邊打噴嚏

limoko

東方日報         2007-05-26
房事本來係一件開心愉快嘅事，男女從中得到靈慾上嘅滿足，感情自然會更進一步。然而，當你發覺與伴侶歡好時，身體出現異常嘅敏感情況，影響房事進行，會否令你感到苦惱，甚至誤以為係性病嘅徵狀呢？今日列出男女經常出現嘅性敏感症狀，作為參考之用，等大家唔使估估吓，誤以為性病就弊傢伙囉。

撰文：卡文

男性性過敏

男性性過敏反應並不常見，有時喺毫冇預知嘅情況下，性過敏症會突然出現喺性事中途。一般來說，性過敏反應分為三種。

第一種係猶如花粉症般，出現不斷打噴嚏嘅情況。部分男人與女性交歡時，總係忍唔住打噴嚏，鼻涕連連，非常難受。其實呢種性過敏情況源於鼻腔黏膜內有一種毛細血管嘅組織，佢哋同男性性器官一樣，只要受到性刺激，就會不斷充血，呈現性反應。部分男人嘅鼻腔過於敏感，毛細血管一旦受到性刺激，就會不斷打噴嚏。

第二種係發生哮喘反應。好多男人對女伴嘅香水、化妝品非常敏感。只要稍稍接近，聞到呢類刺激性氣體嘅味道，就會出現哮喘症狀。尤其係男性與女伴歡好時，身體受性刺激而呈充血狀態，敏感症更容易出現。值得注意係女伴月經前二至三日嘅皮膚氣味同樣會誘發男性哮喘。

第三種係對女伴分泌物過敏，輕則導致男性性器官紅腫、痕癢及發炎，嚴重者更會引致性器官潰爛等症狀。

女性性過敏

女性性過敏嘅情況較為常見，通常可分為兩大類型。

第一種係對避孕套嘅化學劑出現敏感，原來時下流行嘅避孕套，一般除咗有殺精劑外，為咗搞搞新意思，亦會推出士多啤梨、朱古力等具香味嘅款式。呢啲避孕套將香料塗於外層，當女性與男伴歡好時，必然會接觸到呢種香料，因而身體出現過敏情況；另外夜光型避孕套亦有機會導致女性性敏感。由於呢款避孕套將磷及香料等化學物質直接塗喺外層上，如果直接接觸女性性器官，會導致女性出現陰道炎、白帶增多等過敏反應。

第二種嘅性敏感，就係性愛過程中突然出現陰部痕癢、起疹甚至紅腫，出現敏感，係因為對男伴嘅精液過敏。由於精液中含有十多種抗原蛋白，對部分女士來說，其中一種蛋白可導致過敏反應。通常呢種症狀發生於性交結束後幾分鐘內，極少數出現於幾小時甚至幾天後，一般症狀會喺出現數小時後自動消失。

後記：求醫

由於男女性過敏症係較為複雜嘅事件，大家唔能夠靠估，最好嘅方法係先到診所求醫，作出詳細檢查。查出原因後，對症下藥，日後避免再度誘發病因方為上策。