給養魚新手的經驗分享

changpa

見好多新手師兄都想養好自己的金魚, 想有一個好開始,
故希望把從各位師兄那裡偷師得來, 及小弟的經驗分享給和小弟一樣是新手的新手帥兄們.
希望大家也可以行少的路, 有一條比較平坦的養魚之路. 可以開開心心的養魚, 小魚也能健健康康~

A) 環境及裝備方面
1) 首先在家中搵一個合適的環境, 如果可以在有陽光的地方就更好, 因為陽光對小魚本身的
色澤上有很大的幫助.而有陽光, 小魚也比較身體健康. 如環境不容許都沒有關係, 但選魚方面
就要小心的啦. 有些如"包金"或 黑色的小魚就比較難保持到佢地的色澤啦.

2) 裝備方面, 好多新手都想只有一個魚缸, 唔想用濾水及氣泵, 想種d 水草做個自然生態就算,
但小弟可以告訴新手師兄們, 這樣是不能的.因為金魚的排泄物太驚人, 而養魚首要養水, 所以
如果沒有濾水器, 水質好容易受到污染, 因而會使小魚生病, 爛頭, 肉, 鰭, 鰓, 如多好多.............
唔係嚇你~好多依d 病都係懶換水, 新加魚細菌感染所至, 所以濾水器是很重要的~ 而水中的
容氧對小魚也很重要, 故氣泵也不可缺少的.

3) 除了濾水, 氣泵, 魚缸需要準備外, 一個醫生缸也很重要, 因為如果小魚生病或加新魚,
需要隔離醫治及檢疫, 使病菌不要傳染到其他健康的小魚, 而落藥更不宜落在主缸中, 故醫生缸是
很重要, 但很多新手會忽視的.

4) 一些幫忙換水的小工具更不能缺少, 好似一些幫助清理喉管內的"擦"就不可缺少啦, 因為好多時
如果發現主缸受到細菌侵襲威脅的情況下, 需要完成清洗時就有很大的幫助.

5) 濾材方面, 其實只要白棉同生物環就已經很足夠啦, 其實很多時越加越多濾材以為會對小魚更好,
這觀念是錯的, 對新手來說, 所以野都未掌握得到, 又亂加濾材, 影響水質而又不會控制, 最後反而會
使小魚成日有問題, 除了傷害到小魚外, 更會使自己麻煩, 打擊信心, 失去養魚的樂趣.

6) 活性炭係一樣很好的濾材去吸收水中的有害物質, 但同時對小魚也很有傷害性, 故不建議使用.

7) 換水時很多時會弄濕周圍環境, 除了小心外更需要準備好毛巾等物品, 避免家中的老虎殺左你啦~ 呵呵

8) 很多時小魚出問題都因為天氣變化, 溫差突然變化太大而使小魚生病, 所以一支暖管可能對大家有所幫助,
而有冇需要就自行分析, 但金魚一般都不需要的. 裝備的利用係睇使用者會不會使用, 而不是亂用.

9) 好多新手師兄都會覺得魚缸太單調想加些石春, 沙, 草, 玩具之類的落魚缸, 但這些東西不但會藏菌, 有時更會傷害到小魚的身體
而更會增加換水的時間, 自找麻煩. 但如果真係要加的話, 石春, 同水榕(冇木的)係唯一可以加進金魚魚缸的物品.

10) 所有新買的濾材, 裝備一定要先行清洗才好使用, 一些如生物環, 珊瑚骨之類的更要洗乾淨d.............

B) 濾水器的選擇

1) 頂濾: 最方便及建議新手使用, 除過濾能力良好外, 因更為金魚的排泄物驚人, 需要常常換水,清洗濾材等, 故清洗方便是一個很重要的因素.

2) 濾桶: 清洗麻煩, 不建議養金魚使用.

3) 掛濾: 對養金魚這樣高排泄物的物種是完全冇用的.

C) 氣泵的選擇

1) 氣泵除了要選擇靜之外, 更需要選一個夠力的氣泵, 因為容氧對金魚是很重要的, 但要注意如可以的話, 可選擇一些能調教出氣量的氣泵會
比較好. 如日光時間可調高氣量, 夜晚時就可以調低一些給小魚休息 ( 但要注意太高,太低對小魚都不好) 而時間的控制就要睇師兄自己啦, 但
如果新手怕麻煩就調一個適中的就算啦~ 呵呵

2) 氣泵的氣喉可以選擇一些比較硬的.

2) 氣石出氣越幼細就越好~ 呵呵

D) 魚缸燈的選擇

1) 因小弟冇用, 不能分享~ 哈哈 唔好追殺我~ (見你地睇到眼花, 比大家休息下笑下姐)  

2) "魯素燈" 係現在最接近太陽光譜的魚缸燈, 但本身的溫度會很高, 請小心使用, 小弟也不想師兄見到自己缸魚變左清蒸金魚..........

    而裝備上用什麼牌子比較好, 依度就唔講啦~ 師兄們請自行分析.

E) 魚缸

1) 魚缸有分套裝, 自己訂造, 及現貨的

2) 因養金魚需要的水位不用太高, 請不要買一些過高的魚缸. 好多新手會問點解呀?
其實是因為好多新手都會選擇養壽蘭, 因為他很可愛, 但因為這品種的魚是變異出來,
佢本身體質已經有先天性的缺憾, 魚鰾, 內臟等都很弱, 故太高水位的話, 水壓會嚴重
傷害小魚本身.

3) 有些頂濾是需要魚缸有"擔" 的 就是魚缸上方內多4條平放的"邊" 用作放頂濾之用.
但很多現貨魚缸, 因為是水草缸的關係都冇的, 如買左這些冇"擔"的魚缸, 就會限制了
可使用頂濾了. 因很多牌子的頂濾都需要有"擔"的魚缸才能使用.

F) 新缸的處理, 及日常的換水習慣
1) 當魚缸及裝備都準備好後, ,需要怎樣做呢? 當新魚缸返到屋企後最好用粗鹽請洗後,
將魚缸同濾水, 氣泵等set 好, 裝好水, 最好等 1-2星期, 觀察水質, 試下係冇魚的
情況下換水, 看有冇什麼問題, 如冇問題, 就可以準備入魚了.

2) 換水的習慣: 好多時小魚的出事, 都因為懶換水, 水質污染惡化所造成, 如果師兄不能2-3天
換一次水, 一星期左右要清洗濾材魚缸的話, 就建議師兄不要養金魚這高排泄物的魚種啦.

3) 棉及濾材(生物環) 的清洗, 可以使用抽出來魚缸水清洗.

4) 如果清洗魚缸內玻璃? 可以用市面上的工具幫忙清洗, 但小弟只伸手用白棉洗擦, 但注意這樣做之前要先洗手.
當擦完後, 再抽出要換的魚缸水.

睇到依家係唔係覺得養金魚好麻煩呢~ 係架~ 超麻煩架,
但如果這些小細節沒有處理好, 我相信只能每天看到師兄你出post 問條魚點醫點醫啦~

G) 金魚不幸出事後藥物的使用, 及常見問題

1) 個人建議新手師兄可以準備一些藥物係家中防身, 但非到必要時不要亂用.
因為魚藥本身, 除了醫到小魚外, 更能傷害小魚, 一把藥物用在小魚身上, 就算醫好左, 但其實也
同時傷害左小魚, 故不能亂用藥, 更不能聽到阿水話用依隻藥好, 但幾天時間又沒效果, 就去問下d
亂吹店員, 佢又點你買一d 藥, 你又返去倒d 落去.........如果師兄你這樣做的話........恭喜你啦, 你做左殺魚凶手,
原本唔死都比你 sm 死, 要知道就算係人都唔能夠馬上用藥馬上就好, 更何況幾種藥一齊亂用[呢.........

2) 其實有好多問題, 只要換水, 看情況落0.3 - 0.5% 粗鹽 就能解決.

3) 好多新手師兄都會覺得 粗鹽? 咩粗鹽呀? 有野落d 落去就好返? 會唔會好兒戲呀?
   粗鹽其實有助幫助小魚排出他們身體上的一些物質, 而幫忙小魚自己調節自己的身體幫忙自己康復
而鹽也有幫忙殺菌之用, 而千萬不要用錯幼鹽, 因為幼鹽有加工, 及濃度會比粗鹽高,用錯左真係會死魚......
而粗鹽只要買一些普通的天然粗鹽就可以架啦, 超市, 街市, 或一些魚店也會有賣.

4) 新手好多時就因為見小魚好似好餓, 就不停餵食, 因而造成小魚的魚鰾出現問題, 但小魚反肚浮在水面上.
所以新手一定要控制餵食份量及時間, 金魚最好少食多餐, 但因為新手不會控制, 個人建議一天2-3餐, 最好
8 - 9 點前餵食, 等小魚等夠係晚上休息. 當然很多時依個時間都未放工, 所以就要控制一下分量啦.............

5) 有好多時小魚有問題時都會呆滯, 但好多時新手的師兄們會怕佢唔食野會餓親, 反而會比多D 佢食,
但這觀念是錯的, 這樣做不但對小魚冇幫助, 更會使小魚死得快D ~ 因為小魚有問題, 停食係一個好有用的方法~等小魚可以自己調養,
而食野係金魚的天性, 只要你比~佢地就算死都會本能的去食~ 所以有問題, 最好隔離和停食.

6) 所有新魚到家, 不一定要隔離(但要睇係邊度買, 有些地方你睇佢d 魚缸水怪怪地,都知道點做啦)但隔離檢疫會比較安全.
但停食就最好一定要做啦, 因為好多時魚場推出來的小魚已經谷得太利害, 當到你家的時候, 環境, 水質的轉變, 再比多d 野佢食, 就真係送佢一程啦.............
以上的建議係等師兄們方便觀察小魚的狀態及比小魚有時間自我調理.

7) 魚缸中小魚的size : 要注意有一點可能有些師兄唔會留意, 就係如果魚缸中大細魚混養, 有時因為細魚會比較靈活, 只要佢
搶食搶得快, 搶得多, 就會馬上出事, 魚鰾受損, 反肚浮面, 所以這一點也需要考慮. 如發現得早, 停食, 放醫生缸, 及淺水, 有機會會好轉,
但之後食野就要比少d 佢食~

8) 新手常常會出現一個問題, 就是控制唔到自己買魚的自制力(就算老手都控制唔到, 呵呵, 不過不同的地方是老手會知道怎樣去處理, 而新手不會), 好多時
魚缸的密度變化, 可能原本夠用的裝備就需要更換了.

9) 有些新手師兄是因為風水而養一個數量的魚, 一死魚就馬上入新魚, 其實這是一個問題, 死魚的原因是什麼? 還生存的小魚是否有病? 新魚加入會不會把還在魚缸中
但身體已經變弱的小魚帶來新的病菌? 這些也是需要自己注意的, 如果有醫生缸, 就會比較好去做檢疫的工作啦.

10) 好多時雄性的小魚追雌性的小魚想進行偉大的生bb 工作, 有時會因為太激烈而把雌魚弄傷, 所以如果太利害的話把他們分開, 換水落0.3% 粗鹽,
很多小傷(如好像我地表皮紅左但冇出血的情況) 都能自己康復.

11) 天氣一變化, 溫差的影響下, 會使小魚散春, 這時魚缸底就會出現好多一點點白色的魚春, 這時水面會出現好多白色的小泡泡, 這時只能換水及清走魚春,
但一換水又會再散, 所以這時只能每天早晚一次換水落少量粗鹽, 直到小魚散完春, 水質變回正常為止, 但如小弟一樣有每天換水的習慣就沒什麼差別了~ 呵呵

12) 其實除左溫差的變化太大~ ph的變化太大也會影響到小魚的~

13) 金魚也是生物, 如果有一個好的作息時間, 對小魚的健康是很有幫助的~ 小魚也需要休息的喔~ 你2-3點唔瞓~ 但小魚都要瞓架~

H) 如何選擇喜歡的小魚

1) 其實靚魚有佢地的標準, 要如何分辨就要慢慢累積經驗了, 但買魚最重要睇條魚有冇
a) 狀態 / 健康
b) 合眼緣
你見到魚缸的水質起晒泡, d 魚死下死下浮水,沉底, 唔游, 9成都係咁, 就算有一條冇事,你又好鍾意
都唔好捉啦........
但一些, 如黑魚, 包金這些顏色會比較難keep 到佢地的色澤, 新手師兄們如果唔怕甩色, 都可以買架, 如果唔鍾意
佢地甩色就唔好啦~

2) 買魚不要急住一次過要買滿, 其實可以多d 去睇下, 合眼緣, 而小魚又健康時先買, 也可以在返魚時去同師兄們吹下水
問下佢地的意見, 但有一個風險就係小魚的狀態未定.

3) 當你見到條魚, 覺得有問題, 又有疑問, 就算好鍾意, 小弟也建議師兄不要亂買, 因為有可能因一條魚而幫師兄滅缸, 死晒所有愛魚.
所以到最後都係好鍾意, 可以隔幾日再去睇下, 有好多時會發現小魚已經變晒樣就死, 或已經死左唔見左架啦~

4) 當帶新成員小魚回家時, 記得記得一定要做好對水這重要的步驟, 因為水質, 溫差的轉變太急劇會傷害到小魚的.
而對水的方法就是先清洗好裝著小魚的魚袋, 再放進魚缸等待30分鐘 - 45分鐘再剪開魚袋, 把小魚取出放進魚缸.但要
注意!! 魚袋的水是不要的, 千萬唔好把魚袋的水放進魚缸. 我們會假設所有外來的水都是受污染的.
而小弟的對水方法會更麻煩, 因為小弟會對水1 - 2小時,每15分鐘倒去魚袋的水去廁所, 再加一些自己魚缸的水,
以便小魚適應........這只是小弟的做法~ 新手師兄們可以不理~ 呵呵
因為小弟成日比師兄們話~ 哈哈

5) 請注意, 最可愛短身, 頭大的小魚, 係好可愛~ 但也會比較多問題, 比較難養.

6) 注意金魚也有比較動態及靜態的品種,
a) 有些不能太大水流要比較靜的水中養, 好似土佐, 龍睛,等
b) 而草金, 地金就不要同其他比較靜態的金魚一起養, 因為佢地係比較動態的魚種, 會撞傷其實金魚, 或給靜態的金魚們帶來壓力.
c) 一些尖嘴的品種如琉金等 就不要和蘭壽, 壽星等一起養, 因為有些琉金會主動咬其他魚, 有可能會咬傷小魚的身體, 頭肉, 眼睛等.
d) 不要買一些頭肉比較"鬆散"的小魚, 因為這些魚好易會比其他魚攻擊, 咬頭, 及會比"實頭"的小魚更易有爛頭, 頭洞病.
e) 而珠鱗對水質的要求很高, 如果細心觀察就會留意到佢個頭用身體的比例時, 佢個頭是好細的, 所以佢個魚鰓相對也比較小, 使佢地對水的敏感度更高,
呼吸也相對比較吃力, 只要水質有些微變化, 小魚就會好明顯的反映出來, 而控制水質係一門很深的學問, 所以養佢地對新手來說係有難度的.


I ) 餵食的食物

1) 魚糧: 比較乾淨, 但要注意, 餵食前最好可以先浸水5分鐘等魚糧發漲後再餵, 對小魚會比較好

2) 紅虫: 就算係冰虫, 活虫, 都請先花多些時間洗乾淨再餵, 因為紅虫是蚊的幼虫, 佢地本身是很多菌的.

3) 星浮萍 / 菜 : 比較自然的食物, 對小魚的身體也很好, 但注意如果餵菜的話, 請剪碎再餵吧~
小弟只知道生菜, 油墨菜係不錯的選擇~ 呵呵

J) 濾材

唔好意思, 唔記得左tim~ 呵呵

1) 生物環 平的生物環如果師兄細心觀察, 大多數會發現環的表面是平滑的,
而好似ma環的表面是有凹洞的, 這想會比較容易發揮到 [ 藏菌 ] 的作用,
方便製造益菌, 當然生物環也會是一個惡菌, 病菌的好住所, 因此小魚有病,
魚缸發生問題, 生物環就要睇情況部份更換或全部更換了...........................
所以買生物環最好買表面有凹洞的才能發揮佢的作用~而表面光滑的基本上冇咩用~
而生物環是需要在濾水器的底部, 有水浸著先可以給益菌生長.................

2) 棉: 主要的濾材放在入口位置, 主要作用是阻隔小魚的排泄物, 或比較大的污染物, 如殘餘食物等..........

基本上建議新手最多只用上面兩種濾才就好了~

希望以上的經驗分享能幫到新手的師兄們,  
如有什麼地方錯處或需要補充的, 請師兄們幫忙.